Nok NOK? 150 år med norsk krone – er tida inne for euro?

I 2025 fyller krone og øre 150 år som norsk pengeeining – utan den store feiringa. Ei årrekke med svekt kurs har i staden gitt styrkt interesse for moglege alternativ.

I 1875 slutta Noreg seg til den skandinaviske myntunionen, tufta på ein gullstandard. Fram til fyrste verdskrigen var det felles pengestellet i Skandinavia ei suksesshistorie. I dag har Danmark, Sverige og Noreg kvar si krone – og nokså forskjellig pengepolitikk. Svenske og norske kroner flyt fritt, medan den danske er bunden til euro. Samstundes pliktar Sverige eigentleg å innføra euro, medan Danmark har folkerettsleg unnatak frå denne plikta.

Fyrst og fremst er euroen sjølve juvelen i EU-krona: både verdshistorie og den einaste valutaen som internasjonalt hevdar seg ved sida av amerikanske dollar.

Difor spør vi: Er Noreg best tent med norske kroner i nye 150 år, eller bør vi igjen gå inn i ein myntunion? Og då innføra euro, alternativt – i det minste - gjera som danskane og binda oss til euroen?